بسم الله و الحمد لله و الصلاة و السلام على رسول الله..
اللهم افتح علينا حكمتك و انشر علينا رحمتك يا ذا الجلال و الإكرام
و صل اللهم على حبيبنا و نبينا محمد و على آله و صحبه أجمعين.
هذه أول مشاركة لى ودائما تكون أصعب مشاركة .. واللي دايما مش عارف ليه بتقلب معايا بإنشا!..
و لكن.. نستعين بالله.. و نسأله أن يفتح علينا و أن يرزقنا الصدق.. عل الكلمة إن خرجت من القلب.. أن تصل إلى القلب..
******
تفتكر مين أكتر إنسان اتحب و اتعلقت بيه القلوب من يوم ما اتخلق سيدنا آدم لغاية النهاردة؟
انظر حولك.. و فكر شوية
تفتكر كم واحد في العالم النهاردة اسمهم محمد أو أحمد أو محمود أو مصطفى أو طه..
طب كم واحد في التاريخ اتسموا بالأسماء دي؟
تفتكر ليه؟
لأنه اسم أعز الناس.. و أحب الناس.. من إذا ذُكر اسمه.. حُمِّد و حُمِّد و أُثني عليه..
كم واحد تسموا باسمه على مدار التاريخ؟.. و كم كتاب اتكتب عنه بكل لغات الارض؟..
تفتكر فيه حد من البشر من يوم ما اتخلق سيدنا آدم نال الاهتمام و الحب ده كله؟..
أولى معجزاته... هي اسمه.. إسم على مسمى
أحمد.. محمود الصفات.. من هامت القلوب بحبه.. فكان أكثر إنسان اتحب على مدار التاريخ.. أعز الناس إلى قلوب الناس..
ده لو أخدنا نظرة شاملة على الكرة الأرضية.. نظرة "عين طائر" زي مابيقولوا..طب تخيل معايا الكادر عمال يقرب..و يقرب.. لغاية ما الكاميرا وقفت عندك.. و مابقاش فيه في الكادر غيرك انت بس..
ياترى الكلام اللي قلناه ده.. ينطبق عليك انت تحديدا؟..
هل هو أعز الناس بالنسبة لك؟..
أعز الناس... أكتر انسان قلبك متعلق بيه و بيحبه...
اللي ينظر لحال أمتنا النهاردة.. يكاد يجزم ان الإجابة هي "لأ"..
عارف ليه الإجابة لأ؟..
لأنك للأسف ماتقدرش تحب حد ماتعرفهوش..
عادة.. لما بيكون موضوع الحديث هو سيرة النبي .. بتكون المقدمة عبارة عن سرد للأسباب اللي المفروض نحب النبي عشانها و عن أهمية القدوة .. مع شوية بستفة و تهزيق لأي حد متعلق بحد غير النبي من النجوم و الفنانين إلخ..
المشكلة اني مش قادر أعمل ده لأن مش من حقي اقولك تحب مين و ماتحبش مين.. مش من حقي أقيم اختيارك..
و مش من حقي الومك على انك ماحبيتش إنسان ماتعرفهوش.. دي الحقيقة للأسف.. انك فعلا ماتعرفهوش.. لو عرفته لا يمكن تقدر تتعلق بحد غيره..
للأسف.. قليلين في زماننا ده اللي يعرفوا النبي ..
فرق كبير بين انك تعرف قصة حياة إنسان... و بين انك تعرف الإنسان ذاته..
كتير في زماننا ده يعرفوا قصة حياة النبي .. بمستويات مختلفة من المعرفة.. في اللي يعرفها بشكل سطحي مبسط.. و فيه اللي يعرفها بأدق تفاصيلها..
و لكن المشكلة.. ان اللي يعرفوا النبي ذاته كإنسان.. قليلين جدا..
طب و ايه الفرق؟
الفرق هو انك مش هاتحس بقيمته بالنسبة لك.. إلا إذا عرفته كإنسان.. معرفة العشرة.. معرفة إنسان عاشرته و عشت معاه .. بيحب.. وبيكره.. بيفرح.. و بيحزن.. و بيتأثر..
و صدقني.. كل ما اتأخرت المعرفة دي.. كل ماندمك زاد..لأنها مش مجرد معرفة عادية..
لو عرفته حقيقي.. هاتعرف قد ايه كان بين ايديك نعمة كبيرة قوي.. و غافل عنها..
معرفة.. بتدي لحياتك ووجودك معنى.. بتحس معاها ان الحياة لها طعم تاني مختلف..
انا شفت ناس كتير حياتهم انقلبت تماما يوم ماعرفوا النبي .. عرفوه هو.. مش قصة حياته.. حسوا بيه.. عاشوا معاه.. و بقى عايش معاهم.. بقى عايش جواهم..
فهمت لأول مرة في حياتي معنى قول النبي أن إيمان المؤمن لا يكتمل حتى يحب النبي أكثر من نفسه و ماله وولده..
في زمن كل الناس حواليك بيشككوك في دينك و في ربك.. شفت بعيني ازاي المعرفة دي و الحب ده هما اللي بيثبتوك.. بيخلوك زي المبصر وسط العميان..
ماتتخيلش قد ايه نظرتك للدنيا بتتغير.. بتفهمها.. و لما بتفهمها.. بتعرف تعيشها صح.. بتحس لأول مرة في حياتك ان حياتك لها معنى.. لها قيمة.
لأنك لما تعرف النبي .. فانت ماعرفتش انسان.. انت عرفت الإنسان.. فهمت نفسك..
و لأنك ماتقدرش تعرفه من غير ماتحبه و يتعلق قلبك بيه.. لأنه فعلا يتحب..
قصص الحب و التفاني العجيبة للصحابة تجاه النبي .. كان ايه سببها؟.. هل قلوبنا بإيدينا.. نأمرها تحب فلان فتحبه؟.. أبدا.. ماكان حب أصحاب النبي له إلا لأنه أهل لهذا الحب.. ماتقدرش تعرفه من غير ماتحبه.. و كل ماعرفته أكتر.. حبيته أكتر..
و العلماء بيقولوا.. معرفة النبي .. هي عين معرفة الله..
يعني تبقى كمان عرفت ربك.. ماهو احنا زي ما مش عارفين النبي .. فاحنا مش عارفين ربنا.. بنفس المفهوم اللي انا قلته قبل كده..
تخيل؟.. اشتاقلك انت تحديدا.. من أكتر من 1400 سنة.. قبل وفاته.. بكى.. و قال "اشتقت إلى إخواني"..
بالظبط زي الاب اللي لحظة موته مهموم بأولاده..و أولاده مايعرفوهوش..
زي ماقلت.. لاتبخل على نفسك ابدا بهذه المعرفة.. اللي ممكن تغير حياتك تماما..
شاركنا.. و انوي انك تتعلم.. و تعمل بما علمت.. و تنشر اللي انت عرفته بين الناس.. لعل بهذه المعرفة .. تحيي موت أمة.. و تبقى شاركت في الأجر..
و على وعد باللقاء بإذن الله..
و حتى نلتقي.. لا تنسونا من صالح دعائكم.