شخصيات من مدرستنا>> المهندس احمد حمدى

الاسم: احمد حمدى محمد
السن :24 سنة
تاريخ التخرج من المدرسة: 2002 ثناوى عام شعبة علمى رياضة
الكلية : كلية الهندسة - جامعه الاسكندرية قسم كهرباء شعبة الاتصالات والالكترونيات 2007

س:ايه هيا احلامك فى الطفولة وهل قدرت تحققها..
احلامى كانت انى ابقى مهندس من صغرى كنت بحب اجمع اى خشب قديم فى البيت عندنا واركبه فوق بعضه بحيث يكون شكل بيت وكنت بستخبى واعيش واكل داخل البيت الجديد
س: امتى فكرت انك عاوز تدخل هندسة..
فكرت فيها بجد من اولى ثانوى لانى كنت بحب الرياضة جدا ومش بحب المواد الادبية لذا كانت ميولى بتتجه ناحية الهندسة الى جانب تاثرى بدا من طفولتى
س: ايه اللى انت عملته عشان تدخل كلية الهندسة (طرق مذكرتك فى الثانوى العام)
تم شرح الطريق سابقا فى موضوع الطريق الى الهندسة..
س: هل وقفت طموحاتك مع دخولك هندسة ..
لا طبعا ابتدى تحدى جديد وخاصة معايا لان ظروفى فى الثانوى العام كانت صعبة اولا انا جبت فى 2 ثانوى 93 وفى تالتة ثانوى الامتحانات كانت صعبة وجبت 91 ودخلت اسكندرية ساعتها على مجموعى وحمدت ربنا على كدا ودا كان الدافع ليا فى كلية الهندسة عكس ناس كتير كان مجموعاها عالى فى ثانوى ودخلت وهيا مطمنة واتغرت وسقطت طبعا فى اول سنة
س:ممكن تقولنا انت اخترت اى قسم فى كلية هندسة بناء على ايه..
انا اخترت قسم كهرباء لانه من الاقسام اللى بحبها وبندرس فيها شوية كمبيوتر على الكترونيات على كهرباء ولانى كنت بحب الاتصالات ونفسى اعرف نظريتها وازاى الكلام بيتنقل فى الهواء و الخ الخ ومافكرتش فى الشغل ساعتها طبعا لان كل دا بتاع ربنا
س: بعد ماتخرجت عملت ايه..
بعد ماتخرجت توكلت على الله واشتغلت فى اول شغل جالى بالرغم ان مرتبى كان قليل الا انه كان بيكفى مصرف جيبي ودا كل اللى يهم اى اب وام بعد التخرج واقعدت افكر اقوى نفسى فى سوق العمل ازاى فدخلت دورة من منح وزارة الاتصالات فى مجال البرمجيات خلصت منها بعد سنة دراسية ووفرتلى منها اشغال فى اماكن بمرتبات اعلى وارقى
س:تحب توجه اى كلمة لاى شاب فى مقتبل الحياة ..
1-تتوكل على الله حق توكله بمعنى انك ترمى ورا ظهرك اى شيئ فيه مستقبل انت ماليكش حكم عليه بس غير انت اللى تقدر علية بمعنى انك لو ضعيف فى الانجليزى لازم تقوية وماتتحججش فى الزمن او تقول ان البلد مافيهاش شغل لو كان كدا ماكنتوش تشوفوا الافراح على الاقل كل خميس
2-خلوا علاقتكم دايما كويسة ببعض وصدقونى معظم الصداقة بتتكون من الثانوى حتى لو دخلتوا كليات مختلفة
3-ماتتامرش على اى شغل يجيى لك فى الاول وتقول انا دكتور ولا مهندس واتصرف عليا قد كدا لان ربنا مش بينسى مجهود العبد واكيد حتوصل بس بالصبر
4-ابنى نفسك بنفسك وطور نفسك فى مجلك اولا باولا...

واخيرا حفضل دايما اخوكم الكبير واى سؤال انا ف انتظاره........................................م/احمد حمدى

ربنا يوفقك الى ما يرضيه
وان تحقق ما تتمناه

اتمنى ان باقى الخريجين انهم يتكلموا عن نفسهم وياريت انهم لو عجبهم الاسئلة الصحفية اللى قدمتها يعملوا زيها واحسن كمان

كله بأوانه

» شخصيات من مدرستنا>> المهندس احمد سعيد دسوقى
» قريبا>>> شخصيات من مدرستنا
» شخصيات من الزمن الماضى 35 فؤاد المهندس
» شخصيات من الزمن الماضى .. 76.. حمدى غيث
» شخصيات من الزمن الحديث..11..احمد عيد